Stomatoloji müalicədən əvvəl və sonra fotoları.

28 yaşlı xanım uğursuz zirkon bərpa nəticəsində dişlərin qeyri-estetik düzülüşü və rəng fərqliliyindən şikayətlə müraciət edib. Yeni düzəldilən qapaqların ətrafında qanama, diş cərgələrinin anormal təması və ağrı hissi pasiyenti çox narahat edirdi. Rentgenoloji müayinədə bəzi dişlərdə problemlər aşkar olundu. Bir neçə arxa dişlərin olmaması və əksər dişlərin qənayətbəxş vəziyyətdə olmaması səbəbiylə, pasiyent ümumi alt və üst dişlərin bərpasına qərar verib.

İndividual rəgəmsal gülüş dizaynına (digital smile design) uyğun olaraq pasiyent tərəfindən təstiqlənən müalicə planı əsasında 4 həftə ərzində dişəti plastikası, müvəqqəti qapaqların hazırlanması və 2M1 rəng çalarında polixrom (çox rəngli) və semitransparent (yarımşəffaf) "BruxZir Esthetic Zirconia" (ön dişlər üçün) və "BruxZir Full-Strength Zirconia" (arxa dişlər üçün) marka ümumi 21 ədəd zirkon qapaq hazırlandı.

25 yaşlı xanım anadangəlmə diş cərgəsi qüsuru və bəzi dişlərin olmaması nəticəsində çeynəmədə problemlər, gicgah-çənə oynağlarında disfunksiya və estetik görünüşün gənayətbəxş olmaması səbəbiylə müraciət edib. Müayinə və radioloji təhlildən sonra rəqəmsal tam funksional və estetik bərpa planı hazırlandı.

İlkin mərhələdə üst dişlər müvəqqəti PMMA qapaqlar ilə bərpa edildilər və alt çənəyə taxılan xüsusi MORA splinti (Mandibular Orthopedic Repositioning Appliance) vasitəsiylə 8 həftə ərzində alt-üst çənə münasibətlərini düzəldildi və gicgah-çənə oynağlarındakı disfunksiya müalicə edildi. Paralel olaraq üst dişlərin ətrafındakı dişətləri bir neçə etaplı gingivoplastika edilərək simmetriya və dişəti estetikası təmin edildi. Sonrakı mərhələdə, 1 həftə ərzində üst dişlər 12 ədəd "BruxZir Full-Strength Zirconia" marka zirkon qapaqlar ilə bərpa edildi. Son mərhələdə üst çənə üçün qoruyucu və uyğunlaşdırıcı yumşaq kappa hazırlanaraq, ən azı 2 ay istifadə edilməsi tövsiyyə olundu.

46 yaşlı kişi sol üst dişlərində köhnə plombları olan dişlərindəki ağrı, dişlərin arasında qidanın qalması və ağızdan qoxu şikayətiylə müraciət edib. Rentgenoloji müayinədə üç ədəd dişdə köhnə və qənayətbəxş vəziyyətdə olmayan plombların ətrafında ikincili kariyes olduğu aşkar olundu. Hər üç dişi eyni vaxta plomblamaq qərarı verildir.

Təhlükəsizlik tədbirləri alındıqdan sonra yerli anesteziya ilə dişlər hissizləşdirilərək sol üst 3 ədəd dişdə möhcud olan köhnə plomblar çıxarıldı, bütün çürümüş diş toxumaları təmizləndi. Dişlər rubber-dam ilə izolyasiya edilərək təxminən 1 saat ərzində "SDR flow+" və "Ceram.x Spectra ST" kompozit plomb materialları ilə təbii formada bərpa edildilər. Uyğunlaşdırma və cilalamadan sonra dişlər istifadəyə hazır vəziyyətə gətirildi.

29 yaşlı xanım bir neçə il əvvəl travma nəticəsində qırılan ön dişlərini plomblatdırıb. Qısa müddətdə plomblarda tündləşmə, ciddi rəng dəyişimi və dişlərdə həssaslıq yaranıb. Plomblar bir neçə dəfə yenilənsə də, nəticə qənayətbəxş olmayıb. Bizə müraciət ediləndə həm ağrı, həm dişlərin çox uzun olması probleminin ortadan qaldırılması istənildi.

Yerli anesteziya və izolyasi sonrası köhnə plomblar və plombların altında əmələ gələn bütün çürümələr tam təmizləndi. Dişlərin canlı saxlanılması (sinirlərin çıxarılmaması) məqsədiylə ən müasir və keyfiyyətli "Prime&Bond active" plomb yapışdırıcısı (bond) istifadə olunaraq, hər iki diş eyni vaxtda "Ceram.x Spectra ST" kompozit plomb materialı ilə bərpa edildilərək pasiyentin istəyinə uyğun formaya gətirildilər.

23 yaşlı xanım ön üst dişlərində uğursuz kompozit plomblar nəticəsində esetik görünüşün pis olması şikayətiylə müraciət edib. Müayinə və rentgendən sonra rəqəmsal gülüş dizaynı (digital smile design) edilərək press-keramika qapaqlar vasitəsiylə estetik bərpa planı hazırlandı və pasiyentin istəyinə görə edilən şəxsi düzəlişlərdən sonra plan təstiqləndi.

İlkin mərhələdə yararsız kompozit plomblar çıxarıldı, dişlər əvvəlcədən hazırlanan rəqəmsal şablonlara görə yontuldu və müvəqqəti qapaqlar hazırlandı. 2 həftə ərzində 12 ədəd diş "IPS e.max Press" litiyum disilikat (press-keramika) və "IPS e.max Ceram Art" (örtük farforu) materialları vasitəsiylə 2M1 rəng çalarında tam təbii estetik bərpa edildilər.

46 yaşlı xanım arxa dişlərində köhnə metal qapaqlar və ön dişlərinin əyri olması şikəyətiylə müraciət edib. Rentgenoloji müayinə ilə bir neçə problemli dişlər aşkar olunub. Arxa dişlərin zirkon körpülər, ön dişlərin isə press-keramika qapaqlar ilə bərpası təklif olundu.

Köhnə metal qapaqlar çıxarılaraq ehtiyac olan dişlər müalicə olunub və xüsusi materiallar ilə bərpa olunub. Ön dişlərin ətrafında dişəti plastikası (qingivoplastika) edilərək estetika təmin olunub. 2 həftə müvəqqəti qapaqlar istifadədən sonra, ön 4 diş "IPS e.max Press" marka press-keramika qapaqlar ilə, arxa 10 diş isə "IPS e.max ZirCAD" marka zirkon körpülər ilə bərba edilib. Hər iki növ bərpa eyni rəngdə hazırlanıb və heç bir fərq gürünmür. Ümumi müalicə müddəti 4 həftədir.

34 yaşlı kişi ön dişlərində "kompozit vinir" adıyla edilən uğursuz kompozit plomblanma və kariyeslər şikayətiylə müraciət edib. Müayinə və rentgen ilə dişlərin vəziyyəti dəqiqləşdirilib və individual bərpa planı hazırlanılıb. Üst sol mərkəzi kəsici dişin sinirləri çıxarıldığı üçün o diş üçün press-keramika qapaq, diğər 3 diş üçün press-keramika vinir hazırlanması təklif olunub.

Minimal dişəti korreksiyasından sonra dişlər bərpaya hazırlanıb. "Medit i900" marka ağıziçi skaner istifadə olunaraq rəgəmsal ölçülər alınıb. Həm 1 ədəd qapaq, həm də 3 ədəd vinirlar eyni "IPS e.max Press" marka litiyum disilikat (press-keramika) materialdan hazırlanılıb. Qapaq və vinirlar üçün fərqli qalınlıqda və fərqli şəffaflıqda material istifadə olunaraq, bütün bərpa olunan dişlərin eyni görünüşdə olması təmin olunub.

30 yaşlı xanım anadangəlmə flüoroz (çilli dişlər) rənglənməsi olan dişlərini estetik bərpa etmək məqsədiylə müraciət edib. Müayinədən sonra qərara gəlindi ki, dişlərdə minimal yontma edilərək onların press-keramika vinirlərlə həm rəngi, həm də forması yaxşılaşdırılsın.

Lazımı hazırlıqlardan sonra dişlərin ancaq ön səthindən 0,7-0,9 mm. yontularaq ölçülər götürüldü və laboratoriyada "Creation LS Press" marka press-keramika istifadə olunaraq 10 ədəd üst və 4 ədəd alt ön dişlər üçün lamina vinirlar hazırlandı. Vinirlar American Dental Association Continuing Education Recognition Program (ADA CERP) adgeziya protokollarına (yapıştırma qaydalarına) uyğun olaraq "Variolink Esthetic LC" marka sement istifadə olunaraq dişlərə tədbiq edilərək uzun müddət istifadəsi təmin olunub. Müalicənin ümumi müddəti 1 hətdədir.

42 yaşlı kişi bütün dişlərində tünd rəngli ərp və çox miqdarda diş daşları yığılması nəticəsində xoş olmayan estetik görünüş və ağız qoxusu şikayətiylə müraciət edib. Pasiyentin istəyi həm dişləri təmizləmək, həm də ağardmaqdır. Lazım olan müayinələrdən sonra dişləri peşəkar təmizləmək və ardınca kimyasal ağardma üsulu ilə bəyazladmaq təklifi olundu.

Birinci mərhələdə 3 etaplı peşəkar təmizləmə, yanı bütün dişlərin ultrasəs cihazıyla təmizlənməsi (skeylinq), air-flow üsulu ilə dərin təmizləmə və xüsusi parladıcı pastalarla cilalama həyata keçirildi. Bir gün sonra "Opalescence Boost" ağardma geli vasitəsiylə dişlər bəyazladıldı. Ağardılma effektinin artırılması üçün individual incə kappalar hazırlanaraq, 7 gün ərzindi hər gün 4-6 saat ev şəraitində "Opalescence Custom 15%" istifadə edilməsi təmin olundu. Nəticədə diş rəngi ilkin C4 rəngində C1 gənginə qədər 4 ton açıldı.

19 yaşlı xanım dişlərinin təbii rəngindən narazıdır və ağardmaq istəyir. Müayinə nəticəsində xanımım dişlərinin çox əla vəziyyətdə olması, heç bir probleminin olmaması və çox yaxşı ağız gigiyenası olduğu müşahidə olundu.

Eyni gün ərzində bütün dişlər ultrasəs cihazı vasitəsiylə təmizləndi, air-flow üsuluyla dişlərin arası və diş əti cibləri təmizləndi, dişlər fırçalar və xüsusi parladıcı pastalarla cilalandıqdan dərhal sonra ağardılma prosedurlarına keçildi. Dişlərin ağardılması World Dental Society-nin xüsusi "Registered Cosmetic Teeth Whitening Practitioner" protokollarına əsasən minimal zərər və maksimal effektlə həyata keçirildi. Dişlərin bəyazladılması üçün "Whiteness HP AutoMixx" marka ağardma geli istifadə olundu. Dişlər A3.5 rəngindən A1 gənginə qədər 3 ton ağardıldı. Bütün prosedurlar təxminən 2 saat ərzində tamamlandı.

47 yaşlı xanımın dişləri bir neçə il əvvəl köhnə texnologiya olan metal-keramika qapaqlar ilə bərpa edilib. Təəssüflər olsun ki, bu əsnada əksər dişlərin sinirləri çıxarılıb. Qısa bir müddət sonra dişəti problemləri, diş cərgələri münasibətində (qapanışda) uyğunsuzluqlar və qeyri-təbii estetik qüsurlar yaranıb. Xanıma bəzi dişlərin çəkilməsi tövsiyyə olunsa da, biz bütün mövcud dişlərin saxlanılması şərtiylə estetik bərpaya qərar verdik.

Metalo-keramika qapaqlar çıxarıldıqdan sonra, müalicəyə ehtiyac olan dişlər tək-tək yenidən müalicə olundu və müasir protokollara uyğun bərpa olundular. 4 həftə ərzində xüsusi hazırlanan PMMA müvəqqəti qapaqlar istifadə olunaraq dişətinin yenidən şəkilləndirilməsi və yaxşılaşması təmin olundu. Daha sonra dişlər 2M2 rəng çalarında "KATANA Zirconia STML" (Kuraray Noritake, Yaponiya) marka 13 ədəd zirkon körpülər ilə bərpa olundu. Müalicənin ümumi müddəti 6 həftə oldu.

33 yaşlı kişi dişlərində çox saylı kariyeslər (çürüklər), bir neçə dişinin olmaması və dişəti problemləri ilə müraciət edərək, dişlərin həm estetik bərpası, həm də normal çeynəmənin təmin olunmasını istədi. Müayinə və rentgendən sonra dişlərin zirkon qapaqlar, ehtiyac olan hissədə isə körpüylə bərpa edilməsi təklif olundu.

İlkin mərhələdə lazım olan dişlər müalicə olundu, köhnə müalicələr yeniləndi. Hissəvi (sadəcə bir neçə diş) dişəti plastikası edilərək estetik görünüş təmin olundu. Dişlər mütləq sürətdə canlı saxlanıldı, yanı depulpasiya (dişin sinirinin çıxarılması və kanalların doldurulması) edilmədi və müalicə müddətində plastik müvəqqəti qapaqlar istifadə olundu. 2M2 rəng çalarında yarımşəffaf "BruxZir Esthetic Zirconia" marka 9 ədəd zirkon qapaqlar və körpü ilə bərpa edildi. Ümumi müalicə müddəti 3 həftə oldu.

58 yaşlı xanım anadangəlmə diş rənglənməsi (tetrasiklin rənglənməsi), bir neçə arxa dişlərinin olmaması və mədə-bağırsaq xəstəliyi səbəbiylə dişlərdə yaranan eroziya nəticəsində yararsız hala düşən dişlərində ciddi həssaslıq və qeyri-estetik görünüş şikayətiylə müraciət edib. Müayinə və rentgendən sonra, pasiyentin istəyinə uyğun olaraq dişlərin zirkon qapaqlar və körpülərlə bərpa edilməsi üçün rəgəmsal planlama edildi.

İlkin hazırlıqlardan sonra, dişlər yontularaq estetik bərpaya hazırlandı. Bütün dişlər canlılığı mühafizə olundu (sinirləri çıxarılmadı) və tək seansda "DMG Luxatemp Star" materialından müvəqqəti qapaqlar hazırlandı. Ağıziçi rəgəmsal ölçülər vasitəsiylə sadəcə 2 həftə ərzində 19 ədəd "IPS e.max ZirCAD" marka 2M1 rəngində zirkon bərpalar hazırlandı.

31 yaşlı kişi ön üst köhnə kompozit plombları olan dişlərində ağrılar və daimi həssaslıq şikayətiylə müraciət edib. Müayinə və rentgen nəticəsində dişlərdə çox sayda ikincili dərin kriyeslər aşkar olundu. Dişlərin həm sağlamlığını, həm də estetikasını bərpa etmək üçün köhnə pombların dəyişdirilməsinə qərar verildi.

Yerli anesteziya sonrası köhnə plomblar və plombların altında əmələ gələn bütün çürümələr tam təmizləndi. Bütün dişlər canlı saxlanıldı (sinirləri çıxarılmadı). Dişlər rubber-dam ilə izolyasiya edilərək təxminən 2 saat ərzində "Ceram.x Spectra ST" kompozit plomb materiallı istifadə olunaraq, dişlər təbii formada və tam rəng uyğunluğunda bərpa edildilər. Plombların dişdən ayırd edilməməsinə xüsusi diqqət yetirildi. Cilalanmadan sonra dişlər "PermaSeal" materialı ilə qorunaraq istifadəyə hazır vəziyyətə gətirildi.

52 yaşlı kişi sağ üst dişlərində ağrı ilə müraciət edib. Müayinə və rentgen nəticəsində dişlərdə çox sayda dərin kriyeslər və qırılmalar aşkar olundu. Ağız gigiyenası gənayətbəxş deyil. Əvvəlcə narahat edən dişlərin, daha sonra isə bütün kariyesli dişlərin plomblanmasına qərar verildi.

İlkin mərhələdə ağız sanasiyası (diş daşlarının təmizlənməsi, ağız gigiyenasının yaxşılaşdırılması və flüoridləşmə) həyata keçirildi. 1 həftə sonra yerli anesteziya və izolyasi sonrası köhnə plomblar və dişlərdə əmələ gələn bütün çürümələr xüsusi "Sable Seek" kariyes-işarətləyici (karies marker) vasitəsiylə aşkar olunaraq tam təmizləndi. "TPH Spectra ST-HV" marka kompozit plomb materiallı istifadə olunaraq dişlər təbii formada və tam rəng uyğunluğunda bərpa edildilər. Uyğunlaşdırma və cilalamadan sonra dişlər istifadəyə hazır vəziyyətə gətirildi.

37 yaşlı xanım dişlərində çox sayda karies, əyri diş sırası, dişlərdə həssaslıq və xoşagəlməz estetik görünüş şikayətləriylə müraciət edib. Stomatoloji diaqnostika və rəqəmsal müalicə planlamasından sonra dişəti plastikası və ardınca dişlərin press-keramika qapaqlar ilə bərpası məsləhət görüldü.

Birinci mərhələdə frekans-koaqulyator vasitəsiylə dişəti plastikası edilərək həm dəstək dişlərin kifayət qədər uzunluğu, həm də diş konturlarının simmetriyası təmin olundu. Buna paralel olaraq üst ön dişlər kariesdan təmizləndi və "GC Fuji II LC" marka kompozitlə gücləndirilmiş şüşə-iyonomerlə bərpa olunaraq qapaq qoyulması üçün minimal yonuldular. PMMA müvəqqəti qapaqlar hazırlanaraq 4 həftə dişətlərinin düzgün formalaşması gözlənildi. Sonrakı mərhələdə "UCLA/LACC Master Ceramist Program" (University of California, School of Dentistry) protokolu ilə "IPS e.max Press" və "IPS e.max Ceram Art" marka materiallardan "cutback" texnikası istifadə edilərək 8 ədəd 2M2 rəngində press-keramika qapaqlar hazırlandı və dişlərə yapışdırıldı.

32 yaşlı xanım bir il əvvəl mənşəyi məlum olmayan zirkon qapaqlarla ön üst dişlərini bərpa edib. İlk gündən dişətlərində qanama, çənələr arası münasibətində (dişləmdə) yüksəklik və süni görünüşdən əziyyət çəkib. Müayinə və rentgendən sonra zirkon qapaqların press-keramika qapaqlar ilə əvəz edilməsinə qərar verildi.

Birinci mərhələdə köhnə zirkon qapaqlar çıxarılaraq, PMMA müvəqqəti qapaqlar hazırlandı. Eyni zamanda dişəti plastikası edilərək dəstək dişlərin simmetriyası təmin olundu. 4 həftə dişətlərinin formalaşması gözlənildiksən sonra "Creation LS Press" marka litiyum disilikat (press-keramika) material istifadə edilərək 4 ədəd 2M2 rəngində press-keramika qapaqlar hazırlandı və dişlərə yapışdırıldı. Müalicənin ümumi müddəti 6 həftədir.

25 yaşlı xanım dişlərinin xırda olmasından, dişlərin aralı olmasından və diş qövsunun formasından narazıdır. Müayinə nəticəsində xanımım çox yaxşı ağız gigiyenası olduğu və dişətlərində hər hansı problem olmadığı müşahidə olundu. Pasiyent ortodontik müalicə (breket vəya elaynerlər) istəmədiyi və dişlərinin ən qısa müddətdə düzəlməyini istədiyi üçün lamina vinirlar ilə estetik bərpa planlaşdırıldı.

4 ön üst dişlərin ancaq ön səthindən 0,5-0,7 mm. minimal yontularaq, 2 orta kəsici dişlər isə heç yontulmadan "Medit i900" marka ağıziçi skaner istifadə olunaraq ölçülər götürüldü. Sadəcə 1 həftə ərzində "IPS e.max Press" marka press-keramika istifadə olunaraq 2M1 rəng çalarında 6 ədəd lamina vinirlar hazırlandı və dişlərə yapışdırıldı.

26 yaşlı xanım bir neçə alt arxa dişinin olmaması, alt ön dişlərinin isə rənginin pis olması şikayətiylə müraciət edib. Müayinə və rentgen nəticəsində dişlərin anadangəlmə flüoroz nəticəsində gənglənməsi, bir neçə arxa dişin sinirlərinin daha əvvəl çıxarıldığı və yaxşı vəziyyətdə olmayan plomblar olması aşkar olundu. Pasiyent olmayan arxa dişlərin implantasiyasından imtina etdi. Ön alt dişlərin vinirlar, arxa dişlərin isə zirkon körpülər ilə bərpa edilməsi planlaşdırıldı.

Ehtiyacı olan arxa dişlərin yenidən endodontik müalicə edilməsi və "LuxaCore Z Dual" marka xüsusi materialla bərpa edilməsindən sonra, həm arxa dişlər, həm də ön dişlər minimal yontularaq ölçülər alındı. Eyni zamanda müvəqqəti qapaqlar hazırlandı. 2 həftə ərzində 5 ədəd "IPS e.max Press" marka lamina vinir və 9 ədəd "IPS e.max ZirCAD" marka zirkon qapaq hazırlandı. Vinir və zirkonların eyni rəng olması təmin edildi. Alt çənə üçün qoruyucu yumşaq kappa hazırlanaraq, ən azı 2 ay istifadə edilməsi tövsiyyə olundu.

22 yaşlı xanım dişlərinin rəngindən narazıdır. Müayinə nəticəsində dişlərdə və dişətlərində hər hansı problemin olmaması görüldü. Dişlərin kosmetik ağardma proseduruna uyğun olduğu qeyd olundu.

Standart 3 etaplı peşəkar təmizləmədən (dişlərin ultrasəslə təmizlənməsi, air-flow və cilalama) sonra 2 gün ərzində, hərəsi təxminən 40 dəqiqə olan 2 seans şəkilində ağardılma proseduru həyata keçirildi. Ağardılma "Opalescence Boost" ağardma geli vasitəsiylə edildi. Dişlərdə həssaslığın yaranmasının qarşısını almaq üçün 3 gün ərzində, ev şəraitində "UltraEZ" həssaslığı azaldan gel istifadə edilməsi təmin oundu. Nəticədə diş rəngi ilkin A4 rəngində A1 gənginə qədər 4 ton açıldı.